អាស៊ាន៖ លោក វ៉ាត់ ចំរើន អគ្គលេខាធិការគណៈកម្មការអូឡាំពិកកម្ពុជា បានថ្លែងប្រាប់ EAC News នៅថ្ងៃអង្គារម្សិលមិញនេះថា ការប្រកួតកីឡាស៊ីហ្គេម លើកទី៣១ ឆ្នាំ ២០២២ នៅរដ្ឋធានីហាណូយ ប្រទេសវៀតណាម ទំនងជានឹងអាចត្រូវបានលុបចោលជាលើកដំបូងក្នុងប្រវត្តិសាស្រ្តស៊ីហ្គេម ប្រសិនបើម្ចាស់ផ្ទះវៀតណាម នៅតែស្ទាក់ស្ទើរ និងមិនមានការកំណត់ពេលវេលាច្បាស់លាស់ដើម្បីរៀបចំ ស្របពេលក្រុមប្រឹក្សាកីឡាអាស៊ីអាគ្នេយ៍ និងបណ្ដាសមាជិក មិនអាចរង់ចាំចំពោះការអូសបន្លាយនេះបានឡើយ ។
គួរបញ្ជាក់ថា កន្លងមកវៀតណាម បានសម្រេចក្នុងកិច្ចប្រជុំជាមួយក្រុមប្រឹក្សាកីឡាអាស៊ីអាគ្នេយ៍ ក្នុងការពន្យារពេលរៀបចំស៊ីហ្គេម ពីចុងឆ្នាំ២០២១ ទៅខែមេសា ឬខែឧសភា ឆ្នាំ២០២២ខាងមុខវិញ ប៉ុន្តែយ៉ាងណាក្តី មកទល់ពេលនេះវៀតណាមនៅមិនទាន់កំណត់កាលបរិច្ឆេទរៀបចំច្បាស់លាស់ឡើយ។ ផ្អែកតាមហេតុផលនេះ ធ្វើឲ្យបណ្ដាប្រទេសសមាជិក ពិសេសក្រុមប្រឹក្សាកីឡាអាស៊ីអាគ្នេយ៍ មិនអាចរង់ចាំទៀតបាន ហើយបានសម្រេចទុកលក្ខភាពឲ្យវៀតណាមត្រឹមខែតុលាខាងមុខ ដើម្បីសម្រេចចិត្តថា រៀបចំនៅពេលណា? ប្រសិនបើមិនមានការសម្រេចណាមួយនោះទេ ព្រឹត្តិការណ៍ លើកទី៣១ នេះ នឹងត្រូវប្រឈមនឹងការលុបចោលជាប្រវត្តិសាស្ដ្រតែម្ដង ។
គួរដឹងថា ស៊ីហ្គេម លើកទី៣១ នៅរដ្ឋធានីហាណូយ ប្រទេសវៀតណាម ដំបូងឡើយគ្រោងនឹងធ្វើការរៀបចំនៅថ្ងៃទី២១ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១ ប៉ុន្ដែដោយសារការរីករាលដាលខ្លាំង នៃជំងឺកូវីដ-១៩ វៀតណាមក៏បានផ្ញើលិខិតទៅកាន់គណៈកម្មាធិការជាតិអូឡាំពិកគ្រប់បណ្ដាប្រទេសនៅអាស៊ាន ដើម្បីស្នើសុំពន្យារពេលរៀបចំព្រឹត្តិការណ៍ប្រចាំតំបន់នេះ ដោយវៀតណាម បានស្នើការប្រកួតនេះទៅរៀបចំនាខែមេសា ឬខែឧសភា ឆ្នាំ២០២២ តែមកទល់ពេលនេះ វៀតណាម នៅមិនទាន់កំណត់កាលបរិច្ឆេទរៀបចំច្បាស់លាស់នៅឡើយទេ ៕
